Norðurslóðanet Íslands - þjónustumiðstöð norðurslóðamála (e. Icelandic Arctic Cooperation Network) er sjálfseignarstofnun sem var sett á laggirnar árið 2012 en hóf opinberlega starfsemi í febrúar árið 2013. Norðurslóðanet Íslands er samstarfsvettvangur stofnana, fyrirtækja og félagasamtaka á Íslandi sem vinna að málefnum norðurslóða. Við hvetjum til fjölbreytilegrar þátttöku hagsmunaaðila frá öllum landshlutum.

Tilgangur Norðurslóðanetsins er að:

• Auka samskipti og samstarf milli aðila með það að markmiði að styrkja stöðu þeirra sem þekkingarklasa um norðurslóðamálefni á Íslandi.
• Auka sýnileika stofnana og annarra aðila á Íslandi sem vinna að málefnum norðurslóða og þeirra málefna sem þær fjalla um.
• Auka skilning á starfsemi meðlima stofnunarinnar; upplýsa fræðimenn, stjórn­mála­menn og almenning innanlands og erlendis um þá þekkingu og reynslu sem hér hefur skapast á undanförnum árum.
• Gera aðgengilegar upplýsingar um norðurslóðir og þau málefni sem eru hvað brýnust á norðurslóðum.
• Veita stuðning til aukinnar samvinnu milli aðila stofnunarinnar til að styrkja samkeppnishæfni þeirra á þeim sviðum sem þær starfa á.
• Veita leiðbeiningar og ráðgjöf til þeirra sem til stofnunarinnar leita.

Ef þú hefur áhuga á að kynna þér frekar starfsemi netsins eða málefni norðurslóða; koma á framfæri upplýsingum um áhugavert efni, greinar, verkefni eða aðila sem tengjast norðurslóðum þá hvetjum við þig til að hafa samband eða heimsækja okkur á 7. hæð að Borgum.