Rachel Nám í Heimskautarétti vekur athygli á Háskólanum á Akureyri

Rachel Lorna Johnstone er umsjónarmaður náms í heimskautarétti við Háskólann á Akureyri. Hún flutti til Akureyrar ásamt Giorgio, manninum sínum, árið 2003. Upphaflega ætluðu þau að vera til ársdvalar á Íslandi en síðan eru liðin næstum 19 ár. Á þessum tíma hefur Rachael verið aðjúnkt, lektor, dósent og síðan prófessor í Háskólanum á Akureyri.

Sérstaða Háskólans á Akureyri

Háskólinn á Akureyri er eini háskólinn í heiminum sem býður upp á nám í heimskautarétti og leggur áherslu á lög og stjórn bæði í norður- og suðurheimskautinu. „Við erum mjög sérstök að þessu leyti og þess vegna fáum við nemendur erlendis frá.” segir Rachael. Heimskautaréttur byggir ekki bara á lögum heldur einnig almennri stjórn í á heimskautasvæðunum og íbúum þess og sögu. „Þetta snýst ekki bara um lög, sem segja hvað við megum gera og ekki gera. Ef við skoðum ekki alþjóðasamskipti, hagfræði, mannfræði, menningu og sögu þá getum við ekki skilið hvernig lögin virka í raun,“ segir Rachael. Frumbyggjar eru um 10% íbúa á norðurslóð og er stór hluti af náminu að læra um réttindi þeirra, auðlindanotkun, umhverfisrétt, ásamt stefnum og alþjóðasamskiptum milli bæði landanna og fólksins sem þar býr.

Þrjár námsleiðir eru í boði fyrir nemendur sem vilja læra heimskautarétt: LLM fyrir nemendur með bakgrunn í lögfræði, MA fyrir nemendur úr öðrum námsgreinum og diplóma sem viðbót.

Hvetja íslenska nemendur að sækja um

Flestir nemendur í heimskautarétt koma erlendis frá en Rachael segir að þau vilji fá fleiri Íslendinga líka. Hún myndi einnig vilja þróa námið enn frekar og geta boðið upp á það ár hvert en eins og er geta nemendur sótt um annað hvert ár. Rachael segir miður að þau missi af góðum nemendum vegna þessa. Eins hefur Covid sett strik í reikninginn eins og víða og mun færri nemendur sóttu um á þessu ári en vanalega en Rachael segir að þeir sem hafa sótt um séu góðir og sterkir námsmenn.

Ætlaði ekki að flytja til Íslands

Parið bjó í Kanada þegar Rachael var að vinna að doktorsnámi í mannréttindum Sameinuðu þjóðanna þar sem hún skoðaði jafnrétti karla og kvenna á vinnumarkaði. Vinur hennar stakk upp á að hún myndi sækja um stöðu í Háskólanum á Akureyri sem hún ansaði: „nei ég er að klára doktorspróf, ég hef engan tíma!” segir hún og hlær. Þó eftir smá umhugsun ákváðu Rachael og eiginmaður hennar, Giorgio Baruchello, að sækja bæði um stöðu við HA og koma hingað til ársdvalar. „Ég hugsaði allt í lagi ég kem hingað í eitt ár. Síðan fengum við störfin, fluttum hingað og ég hef ekki horft til baka. Fyrst var ég aðjúnkt, og svo lektor, síðan dósent og að lokum prófessor og ég er enn hérna!,“ segir Rachael glöð í bragði.

Ánægð á Akureyri

Rachael segist ekki geta hugsað sér að flytja frá Akureyri eins og er: „nýlega var ég spurð hvar ég myndi vilja búa ef ég gæti farið hvert sem er, eftir langa umhugsun kom ég í raun alltaf aftur til Akureyrar. Hér er svo gott að búa og ala upp börn því það er svo rólegt. Ég er alin upp í bæ í Skotlandi þar sem búa um 9 þúsund manns, þannig að Akureyri er ekki svo öðruvísi. Við erum líka svo heppinn að hafa sterkan og góðan háskóla hérna en á sama tíma ekki of stóran.“

Lesa má um verkefnið og önnur viðtöl hér.

Designed & hosted by Arctic Portal